Big News: ୧୮ ବର୍ଷରୁ ଅଧିକ ସବୁ ଓଡ଼ିଶାବାସୀଙ୍କୁ ମାଗଣାରେ ଟିକା ଦେବେ ରାଜ୍ୟ ସରକାର, କହିଲେ ନବୀନ

News18 Odia Digital

ଭୁବନେଶ୍ୱର: ଓଡ଼ିଶା ସରକାର ରାଜ୍ୟବାସୀଙ୍କୁ ମାଗଣାରେ କରୋନା ଟିକା (Corona Vaccine) ଯୋଗାଇ ଦେବେ । ଏହି ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ । ସେ କହିଛନ୍ତି ଯେ ୧୮ ବର୍ଷରୁ ୪୫ ବର୍ଷ ବୟସ୍କ ରାଜ୍ୟର ସବୁ ନାଗରିକଙ୍କୁ ରାଜ୍ୟ ସରକାର ମାଗଣାରେ କରୋନା ଟିକା ଯୋଗାଇଦେବେ ।

ରାଜ୍ୟ ସରକାରଙ୍କ ଏହି ଯୋଜନା ପାଇଁ ଖର୍ଚ୍ଚ ହେବାକୁ ଥିବା ୨,୦୦୦ କୋଟି ଟଙ୍କା ରାଜ୍ୟ ସରକାର ବହନ କରିବେ ବୋଲି କହିଛନ୍ତି ନବୀନ । ଏହା ଦ୍ୱାରା ରାଜ୍ୟର ୨ କୋଟି ନାଗରିକ ଉପକୃତ ହେବେ । ଏହି ଘୋଷଣା ସହ କୋଭିଡ ନିୟମ ମାନିବାକୁ ରାଜ୍ୟବାସୀଙ୍କୁ ପୁଣି ଥରେ ନିବେଦନ କରିଛନ୍ତି ମୁଖ୍ୟ ମନ୍ତ୍ରୀ । ରାଜ୍ୟବାସୀ ସଚେତନ ନ ହେଲେ ସରକାର ସବୁ କିଛି କରିପାରିବେ ନାହିଁ ବୋଲି ସେ କହିଛନ୍ତି ।

ଏହା ବି ପଢ଼ନ୍ତୁ ଓ ଦେଖନ୍ତୁ VIDEO | ‘ମୋତେ ଠିକ୍ ଚିକିତ୍ସା ମିଳୁନି… ମୁଁ ସ୍ୱାସ୍ଥ୍ୟ କର୍ମୀ’: ମୃତ୍ୟୁ ପୂର୍ବରୁ VIDEOରେ କହିଗଲେ ଲ୍ୟାବ୍ କର୍ମଚାରୀ

‘‘ଜଗନ୍ନାଥଙ୍କ ଆଶୀର୍ବାଦରୁ ରାଜ୍ୟ ଏ ମହାସଙ୍କଟରୁ ଖୁବ୍‌ ଶୀଘ୍ର ମୁକୁଳିବ,’’ କହିଛନ୍ତି ନବୀନ ପଟ୍ଟନାୟକ । ରାଜ୍ୟରେ କରୋନା ଭାଇରସ୍‌ ସଂକ୍ରମଣ ହୁ ହୁ ହୋଇ ବଢ଼ି ଚାଲିଥିବା ଯୋଗୁଁ ସରକାର ସପ୍ତାହାନ୍ତ ସଟଡାଉନ୍‌ ଜାରି କରିଛନ୍ତି । ରାଜ୍ୟରେ ରବିବାର ଦିନ ପୁଣି ୬,୧୧୬ ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହି ସ୍ଥିତିରେ ମୁଖ୍ୟ ମନ୍ତ୍ରୀ ନବୀନ ପଟ୍ଟନାୟକ ରାଜ୍ୟବାସୀଙ୍କୁ ସମ୍ବୋଧନ କରି କରୋନା ଟିକା ମାଗଣେରେ ମିଳିବ ବୋଲି କହିଛନ୍ତି ।



ଏହା ବି ପଢ଼ନ୍ତୁ | ‘ବାପାଙ୍କୁ କୁମ୍ଭ ମେଳାକୁ ଯିବାରୁ ବାରଣ କରିଥିଲି, ହେଲେ ସେ ଶୁଣି ନ ଥିଲେ’: ଶ୍ରବଣ ରାଠୋଡ଼ଙ୍କ ପୁଅ

ସଟଡାଉନର ଭଲ ପ୍ରଭାବ ଦେଖାଯାଉଛି । ଲୋକେ ସଟଡାଉନକୁ ମାନୁଥିବା ଦେଖିବାକୁ ମିଳୁଛି । ତଥାପି କେତେକ ଅଭ୍ୟାସଗତ ଅମାନିଆ ବାହାରେ ବିନା କାରଣରେ ବୁଲୁଥିବାରୁ ପୋଲିସ ସେମାନଙ୍କୁ ରୋକିଛି ଓ ଦଣ୍ଡ ବିଧାନ କରିଛି ।

ଏହା ବି ପଢ଼ନ୍ତୁ | ୧୮ ବର୍ଷ ବା ଅଧିକ? କରୋନା ଟିକା ନେବା ପାଇଁ CoWin ଆପ୍‌ରେ କେମିତି ପଞ୍ଜୀକରଣ କରିବେ ଜାଣନ୍ତୁ

ଓଡ଼ିଶାରେ ସୋମବାର ଦିନ ୩,୪୬୪ ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ନୂଆ ୬,୧୧୬ ଜଣ ଆକ୍ରାନ୍ତଙ୍କ ମଧ୍ୟରୁ ସଙ୍ଗରୋଧ କେନ୍ଦ୍ରରୁ ୩,୫୪୬ ଜଣ ଓ ବାହାରୁ ୨,୫୭୦ ଜଣ ଆକ୍ରାନ୍ତ ଅଛନ୍ତି । ଖୋର୍ଦ୍ଧାରୁ ସର୍ବାଧିକ ୮୭୫ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।



ସୁନ୍ଦରଗଡ଼ରେ ୭୮୫ ଜଣ, ନୂଆପଡ଼ାରେ ୪୩୦ ଜଣ, କଟକରେ ୩୪୩ ଜଣ, କଳାହାଣ୍ଡିରେ ୩୨୧ ଜଣ, ଯାଜପୁରରେ ୩୨୪ ଜଣ, ନବରଙ୍ଗପୁରରେ ୩୧୮ ଜଣ, ସମ୍ବଲପୁରରେ ୨୮୦ ଜଣ, ବରଗଡ଼ରେ ୨୬୮ ଜଣ, ଝାରସୁଗୁଡ଼ାରେ ୨୫୪ ଜଣ, ବଲାଙ୍ଗିରରେ ୧୮୯ ଜଣ ଓ ପୁରୀରେ ୧୮୦ ଜଣ ଚିହ୍ନଟ ହୋଇଛନ୍ତି ।