ମୁମ୍ବାଇ ଇଣ୍ଡିଆନ୍ସ କ୍ରମାଗତ ୯ ବର୍ଷ ଧରି ପ୍ରଥମ ମ୍ୟାଚ୍ ହାରିଲା; ରୋହିତ କହିଲେ - ଚାମ୍ପିଅନସିପ୍ ଜିତିବା ମହତ୍ତ୍ୱପୂର୍ଣ୍ଣ

News18 Odia Digital
ନୂଆ ଦିଲ୍ଲୀ: ମୁମ୍ବାଇ ଇଣ୍ଡିଆନ୍ସ (Mumbai Indians) ଦଳ ନବମ ଥର ପାଇଁ ଇଣ୍ଡିଆନ୍ ପ୍ରିମିୟର ଲିଗର (IPL) ପ୍ରଥମ ମ୍ୟାଚ୍ ଜିତିପାରି ନାହିଁ । ତେବେ ଅଧିନାୟକ ରୋହିତ ଶର୍ମା ଏହା ସ୍ପଷ୍ଟ କରିଛନ୍ତି ଯେ ପ୍ରଥମ ମ୍ୟାଚ୍ ନୁହେଁ ଚାମ୍ପିଅନସିପ୍ ଜିତିବା ଜରୁରୀ ହୋଇଥିବାରୁ ତାଙ୍କ ଦଳ ଏଥିରେ ନିରାଶ ନୁହଁନ୍ତି । ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ (RCB) ଦୁଇ ୱିକେଟ୍ ପରାଜୟ ପରେ ରୋହିତ କହିଛନ୍ତି ଯେ ଏହା ବହୁତ ଭଲ ମ୍ୟାଚ୍ ଥିଲା । ଆମେ ସେମାନଙ୍କୁ ସହଜରେ ଜିତିବାକୁ ଦେଲୁ ନାହିଁ । ଯଦିଓ ଆମେ ଆମର ସ୍କୋରରେ ଖୁସି ନଥିଲୁ । ଆମେ ୨୦ ରନ୍ କମ୍ ସ୍କୋର କରିଥିଲୁ ।

ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରିତ ହେବା ପରେ ମୁମ୍ବାଇ ନଅ ୱିକେଟ୍ ହରାଇ ୧୫୯ ରନ୍ ସଂଗ୍ରହ କରିଥିଲା । ହର୍ଷଲ ପଟେଲ ୨୭ ରନ୍ ଦେଇ ପାଞ୍ଚଟି ୱିକେଟ୍ ନେଇ ମୁମ୍ବାଇକୁ ବଡ଼ ସ୍କୋର କରିବାରେ ବାଧକ ସାଜିଥିଲେ । ଏବି ଡି ଭିଲିୟର୍ସଙ୍କ ୪୮ ରନ୍ ସହାୟତାରେ ଆଠଟି ୱିକେଟ୍ ହରାଇ ଆରସିବି ୧୬୦ ରନ୍ ସ୍କୋର କରି ନିଜର ବିଜୟ ଆରମ୍ଭ କରିଥିଲା । ରୋହିତ କହିଛନ୍ତି, "ଆମକୁ କିଛି ଭୁଲ କରିଛୁ କିନ୍ତୁ ଏହା ହୋଇଥାଏ । ଆମକୁ ଏହାଭୁଲି ଆଗକୁ ବଢିବାକୁ ହେବ । ପିଚ୍‌ ବ୍ୟାଟିଂ କରିବା ସହଜ ନଥିଲା ଓ ପରବର୍ତ୍ତୀ କିଛି ମ୍ୟାଚ୍‌ରେ ଆମକୁ ଏହା ବିଷୟରେ ଚିନ୍ତା କରିବାକୁ ପଡ଼ିବ । ଶେଷ ଚାରି ଓଭରରେ ଆମେ ଡି ଭିଲିୟର୍ସଙ୍କୁ ଆଉଟ କରିବାକୁ ଚାହୁଁଥିଲୁ ।"

ସେ କହିଛନ୍ତି, “ଯେତେବେଳେ ଶେଷ ଚାରି ଓଭର ବାକି ଥିଲା, ଆମେ ଡି ଭିଲିୟର୍ସଙ୍କୁ ଆଉଟ କରିବାକୁ ଚାହୁଁଥିଲୁ । ଏହି କାରଣରୁ ଆମେ ବୁମ୍ରା ଓ ବୋଲ୍ଟଙ୍କ ଦ୍ୱାରା ବୋଲିଂ କରାଇଥିଲୁ । କିନ୍ତୁ ଆମେ ସଫଳ ହୋଇପାରିଲୁ ନାହିଁ। "

କୋହଲି କହିଛନ୍ତି - ଆମର ଅନେକ ବିକଳ୍ପ ଅଛି
ଆରସିବି ଅଧିନାୟକ ବିରାଟ କୋହଲି କହିଛନ୍ତି ଯେ ବିଜୟରୁ ଆରମ୍ଭ କରିବା ଜରୁରୀ ଅଟେ ଓ ଆମର ଅନେକ ବିକଳ୍ପ ଯୋଗୁଁ ଆମେ ମ୍ୟାଚକୁ ଫେରିବାରେ ସକ୍ଷମ ହୋଇଥିଲୁ । କୋହଲି କହିଛନ୍ତି, ଗତଥର ମଧ୍ୟ ଆମେ ପ୍ରଥମ ମ୍ୟାଚ୍ ଜିତିଥିଲୁ । ଆପଣଙ୍କ ଦଳର ମୂଲ୍ୟାଙ୍କନ କରିବାକୁ ଏକ ଶକ୍ତିଶାଳୀ ଦଳ ବିପକ୍ଷରେ ଖେଳିବା ଜରୁରୀ । ସମସ୍ତେ ସହଯୋଗ କରିଥିଲେ । ଆମର ଅନେକ ବିକଳ୍ପ ଥିଲା ଯାହାଦ୍ୱାରା ଆମେ ପ୍ରତ୍ୟାବର୍ତ୍ତନ କରିବାକୁ ସକ୍ଷମ ହୋଇଥିଲୁ । "

ସେ କହିଛନ୍ତି, ପ୍ରଥମ ଇନିଂସରେ ପିଚ୍ ଭଲ ଦେଖାଯାଉଥିଲା । କିନ୍ତୁ ପରେ ବଲ୍ ଧିମା ହୋଇ ବ୍ୟାଟ ପାଖକୁ ଆସୁଥିଲା ​​। ସେଥିପାଇଁ ସହଭାଗୀତା ଗୁରୁତ୍ୱପୂର୍ଣ୍ଣ ଥିଲା । ଏହି ଗ୍ରାଉଣ୍ଡଟି ସେପରି ନୁହେଁ ଯେବେ ଆପଣ ଚାହିଁବେ ସର୍ଟ ଖେଳିପାରିବେ । ଆରସିବି ବିଜୟର ହିରୋ ଡି ଭିଲିୟର୍ସ କହିଛନ୍ତି ଯେ ଆମ ଦଳ ଜାଣିଛି ଯେ ଏହି ପିଚ୍‌ରେ ୧୬୦ ରନ୍‌ର ଲକ୍ଷ୍ୟ ହାସଲ କରିବା ସହଜ ହେବ ନାହିଁ । ଡି ଭିଲିୟର୍ସ କହିଛନ୍ତି, "ମ୍ୟାଚ୍ ବହୁତ ଭଲ ଥିଲା । ଆମେ ଜାଣିଥିଲୁ ବ୍ୟାଟିଂ କରିବା ପାଇଁ ଏହା ସହଜ ପିଚ୍ ନୁହେଁ ଓ ଏହା ସେପରି ୱିକେଟ୍ ଯେଉଁ ପିଚରେ ମ୍ୟାଚ୍ ଆଗକୁ ବଢିବା ସହ ଖେଳିବା କଷ୍ଟସାଧ୍ୟ ହେଉଥିଲା । ତେଣୁ ଆମେ ଜାଣିଥିଲୁ ଯେ ଯଦି ଆମେ ଶେଷ ବଲ ପର୍ଯ୍ୟନ୍ତ ମ୍ୟାଚ୍ ଟାଣିବାରେ ସକ୍ଷମ ହେଲେ ଆମକୁ ଏକ ସୁଯୋଗ ମିଳିବ ।"

ମ୍ୟାନ୍ ଅଫ୍ ଦି ମ୍ୟାଚ୍ ହର୍ଷଲ ପଟେଲ କହିଛନ୍ତି, "ଯେତେବେଳେ ଆରସିବି ମୋତେ ନେଲେ ସେତେବେଳେ ସେମାନେ ମୋତେ କହିଥିଲେ ଯେ ମୁଁ ସେମାନଙ୍କ ଯୋଜନାର ଏକ ଅଂଶ । ମୁଁ ବହୁତ ଖୁସି ଯେ ମୁଁ ସେମାନଙ୍କ ବିଶ୍ୱାସକୁ ପୂରଣ କଲି । ମୁମ୍ବାଇ ବିପକ୍ଷରେ ପାଞ୍ଚଟି ୱିକେଟ୍ ନେଇଥିବା ମୁଁ ପ୍ରଥମ ବୋଲର ବୋଲି ମୁଁ ଜାଣି ନଥିଲି । ମୁଁ ପ୍ରଥମ ଥର ପାଇଁ ପାଞ୍ଚଟି ୱିକେଟ୍ ନେଲି ଓ ତାହା ମଧ୍ୟ ମୁମ୍ବାଇ ବିପକ୍ଷରେ ତେଣୁ ଏହା ସ୍ୱତନ୍ତ୍ର । "