କଟକ ବିଡ଼ାନାସି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗିରଫ ହେଲା; ଦୋକାନରେ ହାଣି ହତ୍ୟା କରିଥିଲା

କଟକ ବିଡ଼ାନାସିର ମଦ ମାଫିଆ ପ୍ରକାଶ ବେହେରା ଓରଫ ହାଡ଼ିଆ ହତ୍ୟାକାଣ୍ଡ ମାମଲାର ମୁଖ୍ୟ ଅଭିଯୁକ୍ତ ଶାନ୍ତନୁ ମଲ୍ଲିକକୁ ପୋଲିସ ଗିରଫ କରିବାରେ ସଫଳ ହୋଇଛି ।

ହତ୍ୟା କରି ଶାନ୍ତନୁ ମଲ୍ଲିକ ହାଇଦ୍ରାବାଦ ଚାଲି ଯାଇଥିଲା ବୋଲି ସୂଚନା ଦେଇଛନ୍ତି କଟକ ଡିସିପି ପ୍ରତୀକ ସିଂ । ମୁଖ୍ୟ ଅଭିଯୁକ୍ତ ଶାନ୍ତନୁ ମଲ୍ଲିକକୁ ବିଡ଼ାନାସୀ ଥାନା ପୋଲିସ ଗିରଫ କରିଛି ବୋଲି ସେ କହିଛନ୍ତି ।

ଗତ ବର୍ଷ ସେପ୍ଟେମ୍ବର ମାସ ୨ ତାରିଖରେ ଆଲିସା ବଜାରର ପ୍ରକାଶ ବେହେରା ଓରଫ ହାଡି଼ଆକୁ ବିଡ଼ାନାସି ସ୍ଥିତ ଏକ ଦୋକାନରେ ହାଣି ହତ୍ୟା କରିଥିଲେ କିଛି ଦୁର୍ବୃତ୍ତ ।

ମଦ ବ୍ୟବସାୟ କରୁଥିବା ହାଡ଼ିଆ ଆପରାଧିକ ମାମଲାରେ ମଧ୍ୟ ସମ୍ପୃକ୍ତ ଥିଲା । ସତୀଚଉରା ଛକ ନିକଟସ୍ଥ ଇପସାରଗଡ଼ାରେ ହୋଇଥିଲା ତା’ ଉପରେ ହୋଇଥିଲା ସଙ୍ଘବଦ୍ଧ ଆକ୍ରମଣ ।

ଭୁଜାଲି ଓ ଲୁହା ପାଇପରେ ହାଡ଼ିଆ ଉପରେ ହୋଇଥିଲା ଆକ୍ରମଣ । ଶାନ୍ତନୁ ଓ ତା’ ଭାଇ ଦୀପକ ମିଶି ହାଡ଼ିଆର ହାତ କାଟି ଦେଇଥିଲେ । ପୂର୍ବ ଶତ୍ରୁତା କାରଣରୁ ଏହି ହତ୍ୟାକାଣ୍ଡ ହୋଇଥିଲା ।

ମଦ ରଖିବା ସ୍ଥାନକୁ ନେଇ ହାଡ଼ିଆ ସହ ଏହି ଦୁଇ ଭାଇଙ୍କର ବାରମ୍ବାର ଝଗଡ଼ା ହେଉଥିଲା । ଅନ୍ୟ ଅଭିଯୁକ୍ତ ଦୀପକ ମଲ୍ଲିକ ଏବେ ବି ଫେରାର ଅଛି ।