ରମାଦେବୀ ଛାତ୍ରୀ ଝରାଫୁଲ ମୃତ୍ୟୁ: ପୁରୁଷ ବନ୍ଧୁ ଗିରଫ ହେଲା; ସାମ୍ନାକୁ ଆସିଲା ନୂଆ CCTV ଫୁଟେଜ୍
ଝରାଫୁଲଙ୍କ ସହ ପ୍ରେମ ସମ୍ପର୍କ ରଖିବାକୁ ଚେଷ୍ଟା କରୁଥିବା ରାକେଶ ସ୍ବାଇଁ ଗିରଫ ହେବା ପରେ ପୋଲିସ ହାତରେ ଲାଗିଛି ଏକ ହୋଟେଲ ବାହାରର CCTV ଫୁଟେଜ । ରାକେଶ ସହ ଭୁବନେଶ୍ବରର ସେହି ହୋଟେଲରେ ସେ ରାତି ବିତାଇଥିବା ସନ୍ଦେହ କରାଯାଉଛି ।
ଭୁବନେଶ୍ୱରର ରମାଦେବୀ ବିଶ୍ବବିଦ୍ୟାଳୟରେ ଯୁକ୍ତ ୩ ଦ୍ବିତୀୟ ବର୍ଷରେ ପଢ଼ୁଥିବା ମୟୂରଭଞ୍ଜର ଝିଅ ଝରାଫୁଲ ନାୟକଙ୍କ ରହସ୍ୟଜନକ ମୃତ୍ୟୁ (Jharaphula Nayak death) ଉପରୁ ଏବେ ବି ହଟିନି ପରଦା । ଝରାଫୁଲଙ୍କୁ ହତ୍ୟା କରାଯାଇଛି ନା ତାଙ୍କର ଅନ୍ୟ କୌଣସି କାରଣରୁ ମୃତ୍ୟୁ ହୋଇଛି, ସେ ନେଇ ଉଭୟ ଯାଜପୁର ଓ କମିଶନରେଟ୍ ପୋଲିସ ଚଳାଇଛି ତନାଘନା ।
ଝରାଫୁଲଙ୍କ ପରିବାରର ଅଭିଯୋଗ କ୍ରମେ ତାଙ୍କ ସହ ପ୍ରେମ ସମ୍ପର୍କ ରଖିବାକୁ ଚେଷ୍ଟା କରୁଥିବା ଭୁବନେଶ୍ବର ସୁନ୍ଦରପଦାର ପାଣି ମିସ୍ତ୍ରୀ ରାକେଶ ସ୍ବାଇଁ ଓରଫ ନନ୍ଦୁ ଗିରଫ ହୋଇଛି ।
ପୋଲିସ ତଦନ୍ତରେ ସହାୟକ ହୋଇଛି ସାମନାକୁ ଆସିଥିବା ଆଉ ଏକ ସିସିଟିଭି ଫୁଟେଜ୍ । ଭୁବନେଶ୍ବର ଧର୍ମବିହାର ଅଞ୍ଚଳରେ ଥିବା ଏକ ହୋଟେଲର ସିସିଟିଭି ଫୁଟେଜରୁ ଜଣାପଡ଼ିଛି ଝରାଫୁଲଙ୍କ ମୃତ ଦେହକୁ ଏକ ନାଲି ସ୍କୁଟିରେ ବସାଇ ନିଆଯାଉଛି (Jharaphula Nayak death)।
କୁହାଯାଉଛି ଯେ ଜାନୁଆରୀ ୨୬ ତାରିଖ ରାତି ରାକେଶ ସ୍ୱାଇଁ ସହ ଏହି ହୋଟେଲରେ ବିତାଇଥିଲେ ଝରାଫୁଲ । ଆଉ ୨୭ ତାରିଖ ଭୋରୁ ଭୋର୍ ତାଙ୍କ ମୃତ ଦେହକୁ ହୋଟେଲରୁ ସ୍କୁଟିରେ ବାହାରକୁ ନିଆଯାଇଥିଲା ।
ପୂର୍ବରୁ ଯାଜପୁର କୁଆଖିଆରେ ପ୍ରଥମେ ମିଳିଥିବା ସିସିଟିଭି ଫୁଟେଜରେ ମଧ୍ୟ ଏହି ସ୍କୁଟିରେ ଦୁଇ ଜଣ ଯୁବକ ଝରାଫୁଲର ମୃତ ଦେହ ଧରି ଯାଉଥିବା ଦେଖିବାକୁ ମିଳିଥିଲା । ଏଥିରୁ ସନ୍ଦେହ କରାଯାଉଛି ଯେ ଝରାଫୁଲଙ୍କ ମୃତ୍ୟୁ ପରେ ତାଙ୍କ ମୃତ ଦେହକୁ ଫିଙ୍ଗି ନିଶ୍ଚିହ୍ନ କରିବା ପାଇଁ ଭୁବନେଶ୍ବରରୁ ଯାଜପୁରକୁ ନିଆଯାଇଥିଲା ।
ସ୍କୁଟିରେ ଥିବା ଦୁଇ ଜଣ ବ୍ୟକ୍ତି କିଏ ତା’ର ଛାନଭିନ୍ ଚଳାଇଛି ପୋଲିସ । ପରିବାର ଲୋକେ ବି କହିଛନ୍ତି ଯେ ରାକେଶ ସହ ଝରାଫୁଲଙ୍କର ଥିଲା ପ୍ରେମ ସମ୍ପର୍କ । ରାକେଶ ଯଶୀପୁରରେ ପାଣି ପାଇପ କାମ କରୁଥିବା ବେଳେ ଝରାଫୁଲଙ୍କ ସହ ତା’ର ସମ୍ପର୍କ ଗଢ଼ି ଉଠିଥିଲା ।
ରମାଦେବୀ ବିଶ୍ବବିଦ୍ୟାଳୟରେ (Ramadevi University) ପଢ଼ିବା ବେଳେ ଝରାଫୁଲ ନିୟମିତ ଭାବେ ରାକେଶଙ୍କ ସହ ମିଳାମିଶା କରୁଥିବା ପୋଲିସ ସନ୍ଦେହ କରୁଛି ।
କମିଶନରେଟ୍ ପୋଲିସ ଅଭିଯୁକ୍ତ ରାକେଶକୁ ଯାଜପୁର ପୋଲିସକୁ ହସ୍ତାନ୍ତର କରିଛି । ଯାଜପୁର ଟାଉନ ଥାନାରେ ରାକେଶକୁ ପଚରାଉଚରା କରୁଛନ୍ତି ଏସ୍.ପି. ରାହୁଲ ପି. ଆର୍. (ଫଟୋରେ) ।
ପ୍ରଥମ ସିସିଟିଭି ଫୁଟେଜ୍ ଯାଜପୁର କୁଆଖିଆ ପୋଲିସ ହାତରେ ଲାଗିଥିଲା । ୨୭ ତାରିଖ ସକାଳ ୯ଟା ୭ ମିନିଟରେ ଏକ ସ୍କୁଟିରେ ଦୁଇ ଜଣ ଝରାଫୁଲଙ୍କ ମୃତ ଦେହକୁ ଧରି ବସିଛନ୍ତି । ଏହାର ଦୁଇ ଦିନ ପରେ ଆଉ ଏକ ସିସିଟିଭି ଫୁଟେଜ ଲାଗିଛି କମିଶନରେଟ୍ ପୋଲିସ ହାତରେ । ଏହି ସିସିଟିଭି ଫୁଟେଜ୍ ମଧ୍ୟ ୨୭ ତାରିଖର ।
ଦ୍ୱିତୀୟ ସିସିଟିଭି ଫୁଟେଜର ସମୟ ହେଉଛି ୨୭ ତାରିଖ ସକାଳ ପ୍ରାୟ ୭ଟା ୨୧ ମିନିଟର । ଦୁଇଟି ଯାକ ସିସିଟିଭି ଫୁଟେଜ ଭିତରେ ସମୟର ବ୍ୟବଧାନ ଦୁଇ ଘଣ୍ଟାରୁ ଅଧିକ । ଭୁବନେଶ୍ବରରୁ ଯାଜପୁର କୁଆଖିଆ ଯିବା ପାଇଁ ଦୁଇ ଘଣ୍ଟା ସମୟ ବି ଲାଗିଯାଇପାରେ । ତେଣୁ ସନ୍ଦେହ କରାଯାଉଛି ଯେ ଝରାଫୁଲଙ୍କ ମୃତ୍ୟୁ ଭୁବନେଶ୍ବରରେ ହୋଇଥିଲା, କିନ୍ତୁ ମୃତ ଦେହ ଡିସପୋଜାଲ ହୋଇଥିଲା ଯାଜପୁରରେ ।
ସିସିଟିଭିରେ ଦିଶୁଥିବା ସ୍କୁଟିରେ ମୃତ ଦେହ ସହ ଥିବା ଦୁଇ ଜଣଙ୍କ ମଧ୍ୟରୁ ଯଦି ଜଣେ ଅଭିଯୁକ୍ତ ରାକେଶ ହୋଇଥାଏ, ତେବେ ତଦନ୍ତ ରହସ୍ୟ ଫିଟାଇବାରେ ପୋଲିସକୁ ବେଶୀ ସମୟ ଲାଗିବ ନାହିଁ ବୋଲି କହିଛନ୍ତି ଜଣେ ତଦନ୍ତକାରୀ ପୋଲିସ ଅଧିକାରୀ ।
ଶୁକ୍ରବାର ଦିନ ଯାଜପୁରରେ ଝରାଫୁଲଙ୍କ ମୃତ ଦେହ ଫିଙ୍ଗାଯାଇଥିବା ସ୍ଥାନ ବୁଲି ଦେଖିଛନ୍ତି ମହିଳା କମିଶନ ଅଧ୍ୟକ୍ଷା ମୀନତି ବେହେରା । ପୋଲିସ ତଦନ୍ତ ଜାରି ରହିଥିବା ବେଳେ ମହିଳା କମିଶନ ମଧ୍ୟ ଏହି ଘଟଣା ଉପରେ ନଜର ରଖିଥିବା କହିଛନ୍ତି ସେ ।
ରମାଦେବୀ ମହିଳା ବିଶ୍ବବିଦ୍ୟାଳୟର (Ramadevi University) କ୍ୟାମ୍ପସ ବାହାରେ ଏହି ଘଟଣା ଘଟିଥିଲେ ବି ପୋଲିସର ତଦନ୍ତରେ ସହଯୋଗ କରିବାକୁ ବିଶ୍ୱବିଦ୍ୟାଳୟ ପ୍ରଶାସନ ପ୍ରସ୍ତୁତ ଅଛି ବୋଲି କହିଛନ୍ତି ବିଶ୍ବବିଦ୍ୟାଳୟର କୁଳପତି ଅପରାଜିତା ଚୌଧୁରୀ ।
ପୋଲିସ ସଠିକ୍ ଅନୁସନ୍ଧାନ କରି ଅଭିଯୁକ୍ତଙ୍କୁ ଧରି ଝରାଫୁଲକୁ ନ୍ୟାୟ ଦେବେ ବୋଲି ଆଶା ବ୍ୟକ୍ତ କରିଛନ୍ତି ତାଙ୍କ ବାପା ରମାକାନ୍ତ ନାୟକ ।
୨୬ ତାରିଖ ଦିନ ଦିନ ୧୧ଟା ପାଖାପାଖି ଜୟଦେବ ବିହାରରେ ଝାଡ଼େଶ୍ୱର ବସରେ ବସି ଭୁବନେଶ୍ୱର ଫେରୁଥିଲେ, ମାତ୍ର ବାଣୀବିହାର ଛକରେ ଓହ୍ଲେଇଯାଇଥିଲେ ବୋଲି ଫୋନରେ ବାପାଙ୍କୁ କହିଥିଲେ ଝରାଫୁଲ ।
ଝରାଫୁଲଙ୍କ ମୃତ ଦେହ ପାଖରୁ ମିଳିଥିବା ମୋବାଇଲ ଫୋନରୁ ଜଣାପଡ଼ିଥିଲା ସେ ଶେଷ ଥର ପାଇଁ ପରିବାର ଲୋକଙ୍କ ସହ ହ୍ବାଟ୍ସ ଆପରେ ଚାଟିଂ କରିଥିଲେ ।
ଝରାଫୁଲଙ୍କ ଭାଇ ତାଙ୍କୁ ପଚାରିଥିଲେ, ‘‘ତୁ କେଉଁଠି ଅଛୁ । ତୋ’ ଫୋନ୍ ଲାଗୁନି ।’’ ଝରାଫୁଲ ତାଙ୍କୁ ଉତ୍ତରରେ କହିଥିଲେ, ‘‘ଜମା ବ୍ୟସ୍ତ ହୁଅନି । ମୁଁ ମୋ’ ସାଙ୍ଗ ଘରେ ଅଛି । ଏଠି ନେଟୱର୍କ ଲାଗୁନି ।’’
ଝରାଫୁଲ ନାୟକଙ୍କ (Jharaphula Nayak) ମୃତ ଦେହ ଯାଜପୁର କୁଆଖିଆ ଥାନା ମୂଳାପାଳ ନିକଟ ରାସ୍ତା କଡ଼ରୁ ଜାନୁଆରୀ ୨୭ ତାରିଖ ସକାଳେ ମିଳିଥିଲା ।
