ଭୁବନେଶ୍ୱର ରମାଦେବୀ ବିଶ୍ବବିଦ୍ୟାଳୟରେ ପଢ଼ୁଥିଲେ ମୟୂରଭଞ୍ଜର ଝିଅ; ତାଙ୍କ ଶବ ମିଳିଲା ଯାଜପୁରରେ

ଭୁବନେଶ୍ୱରର ରମାଦେବୀ ବିଶ୍ବବିଦ୍ୟାଳୟରେ ଯୁକ୍ତ ୩ ଦ୍ବିତୀୟ ବର୍ଷରେ ପଢ଼ୁଥିବା ମୟୂରଭଞ୍ଜର ଝିଅ ଝରାଫୁଲ ନାୟକଙ୍କ (Jharaphula Nayak) ମୃତ ଦେହ ମିଳିଛି ଯାଜପୁର କୁଆଖିଆ ଥାନା ମୂଳାପାଳ ନିକଟ ରାସ୍ତା କଡ଼ରୁ ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ଦୁଇ ଜଣ ଦୁର୍ବୃତ୍ତ ଏକ ସ୍କୁଟିରେ ଆସି ଯୁବତୀଙ୍କ ମୃତ ଦେହକୁ ରାସ୍ତା କଡ଼ରେ ଫିଙ୍ଗିଦେଇ ଚାଲି ଯାଇଛନ୍ତି ।

ଦୁର୍ବୃତ୍ତମାନେ ଝରାଫୁଲଙ୍କୁ ଅନ୍ୟ କେଉଁଠି ହତ୍ୟା କରି ମୂଳପାଳ ଛକକୁ ଆଣି ଫିଙ୍ଗି ଦେଇଥିବା ସନ୍ଦେହ କରାଯାଉଛି ।

ସିସିଟିଭିରେ ଏହି ପୁରା ଘଟଣା କଏଦ ହୋଇଛି । ସ୍ଥାନୀୟ ଲୋକଙ୍କ କହିବା ଅନୁସାରେ ସେହି ସ୍କୁଟିରେ ଜଣେ ଯୁବତୀ ବି ଥିଲେ । ଏହି ଘଟଣା ବୁଧବାର (ଜାନୁଆରୀ ୨୭) ସକାଳ ପାଖାପାଖି ୯ଟା ବେଳର ।

ପୋଲିସ୍ ସିସିଟିଭି ଫୁଟେଜ୍‌ ଆଧାରରେ ତଦନ୍ତ ଆରମ୍ଭ କରିଛି ।

ରମାଦେବୀ ବିଶ୍ବବିଦ୍ୟାଳୟରେ (Ramadevi University) ଯୁକ୍ତ ତିନି ଦ୍ବିତୀୟ ବର୍ଷର ଫିଲୋସୋପି ଅନର୍ସ ଛାତ୍ରୀ ଥି୍ଲେ ଝରାଫୁଲ ନାୟକ । ତାଙ୍କ ଘର ମୟୁରଭଞ୍ଜ ଜିଲ୍ଲା ଯଶୀପୁର ଥାନା ମରୁଣ୍ଡେଇପଶି ଗାଁରେ । ତାଙ୍କ ବାପାଙ୍କ ନାଁ ରମାକାନ୍ତ ନାୟକ ବୋଲି ଜଣାପଡ଼ିଛି ।

ଝରାଫୁଲଙ୍କ ମୃତ ଦେହ ପାଖରୁ ମିଳିଥିବା ମୋବାଇଲ ଫୋନରୁ ଜଣାପଡ଼ିଛି ସେ ଶେଷ ଥର ପାଇଁ ପରିବାର ଲୋକଙ୍କ ସହ ହ୍ବାଟ୍ସ ଆପରେ ଚାଟିଂ କରିଥିଲେ ।

ଝରାଫୁଲଙ୍କ ଭାଇ ତାଙ୍କୁ ପଚାରିଥିଲେ, ‘‘ତୁ କେଉଁଠି ଅଛୁ । ତୋ’ ଫୋନ୍ ଲାଗୁନି ।’’ ଝରାଫୁଲ ତାଙ୍କୁ ଉତ୍ତରରେ କହିଥିଲେ, ‘‘ଜମା ବ୍ୟସ୍ତ ହୁଅନି । ମୁଁ ମୋ’ ସାଙ୍ଗ ଘରେ ଅଛି । ଏଠି ନେଟୱର୍କ ଲାଗୁନି ।’’

ବୁଧବାର ସକାଳେ ପୁଣି ପରିବାର ଲୋକେ ହ୍ୱାଟ୍ସଆପରେ କହିଥିଲେ, ‘‘ଯଦି ତୁ କଥା ହୋଇପାରୁନୁ, ତେବେ ତୋ’ ସାଙ୍ଗ ସହ କଥା କରାଇ ଦେ ।’’ କିନ୍ତୁ ଆଉ ଝରାଫୁଲଙ୍କ ପକ୍ଷରୁ କୌଣସି ଉତ୍ତର ମିଳି ନ ଥିଲା । ମୋବାଇଲ ଫୋନରେ ଥିବା ଏହି ଶେଷ ଚାଟିଂ ପୋଲିସକୁ ଦେଇପାରେ ଅନେକ କିଛି ପ୍ରମାଣ ।

ଜାନୁଆରୀ ୨୪ ତାରିଖ ସକାଳେ ଝରାଫୁଲ ନିଜ ଘରୁ ବସରେ ଭୁବନେଶ୍ବର ଆସିଥିଲେ ଓ ୨୫ ତାରିଖ ଦିନ ନିଜ ବଡ଼ ଭଉଣୀଙ୍କ ଜନ୍ମଦିନ ପାଳନରେ ଯୋଗ ଦେଇଥିଲେ ବୋଲି କହିଛନ୍ତି ତାଙ୍କ ବାପା ରମାକାନ୍ତ ନାୟକ । ୨୬ ତାରିଖ ଦିନ ଦିନ ୧୧ଟା ପାଖାପାଖି ସେ ଜୟଦେବ ବିହାରରେ ଝାଡ଼େଶ୍ୱର ବସରେ ବସି ଭୁବନେଶ୍ୱର ଫେରୁଥିଲେ, ମାତ୍ର ବାଣୀବିହାର ଛକରେ ଓହ୍ଲେଇଯାଇଥିଲେ ବୋଲି ଫୋନରେ ତାଙ୍କ ବାପାଙ୍କୁ ସେ କହିଥିଲେ ।

ଝରାଫୁଲଙ୍କ ବାପା କହିଛନ୍ତି ଯେ ସେ ଭୁବନେଶ୍ୱରରେ ତାଙ୍କ କ୍ଲାସମେଟ୍‌ ତଥା ସାଙ୍ଗ ସୋନାଲୀ ଘରେ ଅଛନ୍ତି ଓ ତାଙ୍କ ଦେହ ଭଲ ଲାଗୁନି । ହେଲେ ତା’ ପରେ ଝରାଫୁଲଙ୍କ ସହ ପରିବାର ଲୋକଙ୍କର କୌଣସି ଯୋଗାଯୋଗ ହୋଇ ପାରି ନ ଥିଲା । (ଫଟୋରେ ଝରାଫୁଲଙ୍କ ଶବ ନିକଟରେ ପଡ଼ିଥିବା ତାଙ୍କ ବ୍ୟାଗ୍‌)

ଝରାଫୁଲଙ୍କ ସେହି ସାଙ୍ଗ ସୋନାଲୀଙ୍କ ଘର କେଉଁଠି ତାହା ତାଙ୍କ ବାପା ଓ ପରିବାର ଲୋକେ ଜାଣି ନ ଥିବା କହିଛନ୍ତି । ପୋଲିସ ଏବେ ଏହା ଜଣିବାକୁ ପ୍ରୟାସ କରୁଛି । (ଫଟୋରେ ଝରାଫୁଲଙ୍କ ଶବ ନିକଟରେ ପଡ଼ିଥିବା ତାଙ୍କର ଗୋଟିଏ ଜୋତା)

ଝରାଫୁଲ ଏକା ନିଜ ଘରୁ ଭୁବନେଶ୍ୱର ବସରେ ଯିବା ଆସିବା କରନ୍ତି ବୋଲି ତାଙ୍କ ବାପା କହିଛନ୍ତି । ତାଙ୍କର କୌଣସି ପାରିବାରିକ ମନୋମାଳିନ୍ୟ ବି ନ ଥିଲା ବୋଲି ସେ କହିଛନ୍ତି ।

ଭଉଣୀର ମୃତ ଦେହ ଦେଖି କାନ୍ଦୁଥିବା ଭାଇ କହିଛନ୍ତି ଯେ ରାକେଶ ସ୍ୱାଇଁ ନାମକ ଜଣେ ଯୁବକ ଉପରେ ପରିବାରର ସନ୍ଦେହ ହେଉଛି । ଝରାଫୁଲଙ୍କୁ ବାରମ୍ବାର ଫୋନ୍‌ କରିବାକୁ ମନା କରାଯାଇଥିଲେ ବି ରାକେଶ ଫୋନ୍‌ କରୁଥିଲେ ବୋଲି କହିଛନ୍ତି ତାଙ୍କ ଭାଇ (ଫଟୋରେ)।

ଏହି ଘଟଣାର ସତ୍ୟ ଉଦଘାଟନ କରିବା ପୋଲିସ ପାଇଁ ଏକ ଚ୍ୟାଲେଞ୍ଜ ହୋଇଛି । ଏହା ଏକ ହତ୍ୟା ବୋଲି ସନ୍ଦେହ କରାଯାଉଛି ।

ଅକାଳରେ ଝଡ଼ିଯାଇଥିବା ଝରାଫୁଲ ନାୟକଙ୍କ ମୃତ୍ୟୁ ଖବର ପାଇ ତାଙ୍କ ପରିବାର ସମେତ ସାଙ୍ଗ ସାଥୀମାନେ ମର୍ମାହତ ହୋଇଛନ୍ତି । ସେମାନେ ତାଙ୍କ ପାଇଁ ନ୍ୟାୟ ଦାବି କରିଛନ୍ତି ।