CCTV: ଇଣ୍ଡିକେଟର୍ ନ ଦେଇ ଗାଡ଼ି ମୋଡ଼ିଦେଲା; ପଛରୁ ଆକ୍ଟିଭାରେ ଆସୁଥିବା ଝିଅଟିର ମୃତ୍ୟୁ ହେଲା

ଜଣେ ୧୯ ବର୍ଷର ଝିଅ ନିଜ ଆକ୍ଟିଭା ସ୍କୁଟିରେ ଘରକୁ ଫେରୁଥିବା ବେଳେ Sକ ମର୍ମନ୍ତୁଦ ସଡ଼କ ଦୁର୍ଘଟଣାରେ ତା’ର ମୃତ୍ୟୁ ହୋଇଛି । ଝିଅଟି ଠିକ୍‌ ଲେନରେ ସ୍କୁଟି ଚଳାଇ ଆସୁଥିଲା, ହେଲେ ତା’ ଆଗରେ ଯାଉଥିବା ବାଇକ୍‌ ଇଣ୍ଡିକେଟର୍‌ ନ ଦେଇ ଡାହାଣକୁ ବାଇକ୍‌ ମୋଡ଼ିଦେବାରୁ ଝିଅଟିର ସ୍କୁଟି ଭାରସାମ୍ୟ ହରାଇ ତା’ ସହ ବାଡ଼େଇ ହୋଇଯାଇଥିଲା ଓ ସେ ରାସ୍ତା ଉପରେ ଛିଟକି ପଡ଼ିଥିଲା।

ଏହି ସଡ଼କ ଦୁର୍ଘଟଣାରେ ୧୯ ବର୍ଷୀୟା ଛାତ୍ରୀ ତନିଷ୍କା ସାଲୁଜାଙ୍କ ମୃତ୍ୟୁ ହୋଇଛି । ସିସିଟିଭି ଫୁଟେଜରେ ଦୁର୍ଘଟଣାର କାରଣ ସ୍ପଷ୍ଟ ଦେଖାଯାଉଛି ।

ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ମଧ୍ୟ ପ୍ରଦେଶର ଇନ୍ଦୋର ସହରରେ । ଏହି ଦୁର୍ଘଟଣାର ସିସିଟିଭି ଫୁଟେଜ ସାମ୍ନାକୁ ଆସିଛି ।

ଜଣେ ବାଇକ୍‌ ଚାଳକଙ୍କ ଅବହେଳା ଯୋଗୁଁ ତନିଷ୍କା ସାଲୁଜାଙ୍କ ମୃତ୍ୟୁ ଘଟିଛି । ତାଙ୍କୁ ଡାକ୍ତରଖାନା ନିଆଯାଇଥିଲା, ହେଲେ ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ ।

ଏହି ସଡ଼କ ଦୁର୍ଘଟଣା ପରେ ପୋଲିସ ଘଟଣାର ସିସିଟିଭି କ୍ୟାମେରା ଫୁଟେଜ୍ ଖୋଜିଥିଲା । ଏଥିରୁ ଦୁର୍ଘଟଣାର କାରଣ ଜଣେ ବାଇକ୍‌ ଚାଳକଙ୍କ ଅବହେଳା ବୋଲି ଜଣା ପଡ଼ିବା ପରେ ତାଙ୍କ ବାଇକର ନମ୍ବର ଆଧାରରେ ତାଙ୍କ ବିରୋଧରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ପୋଲିସ୍‌ ।